Hurrengo geltokia: Amara-Easo – Proiektuen aurkezpena

Eusko Jaurlaritzako Etxebizitza eta Hiri Agenda Sailak Donostiako Udalarekin lankidetzan bultzatuta eta Euskadiko Arkitektura Institutuak OFF Mugak programaren barruan antolatutako “Hurrengo geltokia: Amara – Easo” erakusketaren baitan, proiektuen aurkezpen publikoak egingo dira urriaren 25ean, 11:00etan. 

Aurkezpen hauen bidez, Playa de Vias proiketuaren inguruan egin den parte hartze prozesua herritarrengana gerturatu nahi da. 

Eusko Jaurlaritzak Donostiako Udalarekin lankidetzan bultzatutako Amara auzoan dagoen Hiri Antolamendurako Plan Orokorraren (HAPO) aldaketa puntuala idazteko lehiaketa publikoaren bigarren fasera igaro diren hiru estudioek hartuko dute parte: JPAM City Makers, RAZ + Usandizaga eta estudio beldarrain.

Partehartzaileak:

JPAM City Makers estudiotik Samuel Llovetek, Amado Martín-ek eta Jorge Pereak “Habitar el bosque urbano” proiektua aurkeztuko dute.

RAZ estudiotik Gilen Txintxurreta Beitiak eta Ander Gortazar Balerdik “Kalerik kale plazarik plaza” aurkeztuko dute, RAZ + Usandizagak egindako proiektua.

Beldarrain estudioko Juan Beldarrainek “Hari berdez hiria josi” proiektua aurkeztuko du.

Parte-hartzailei buruz:

Jorge Perea, Amado Martín eta Samuel Llovet

JPAM City Makers estudioko zuzendariak dira Jorge Perea, Amado Martín eta Samuel Llovet, nazio mailako eta nazioarteko hiri-proiektuetan eskarmentu akademiko eta profesional handia duten arkitektoak. JPAM City Makers Bartzelonako arkitektura eta hirigintza estudio bat da, hiriko pentsamenduan eta forma arkitektonikoan oinarritutako ikuspegia duena. Hamar urte baino gehiagoko ibilbidea dauka estudioak eta hainbat sari jaso ditu, hala nola, Glorias plazaren ondoan dagoen Gran Via de les Corts Catalanes birmoldatzeagatik, C-31 korapiloa Ronda Litoral bihurtzeagatik lehen saria jaso zuen, eta Manuel de Solà-Morales Bi Urteko Hirigintza Sariaren akzesita Sant Boi de Llobregateko Mendi Auzoak hobetzeko planagatik.

Ander Gortazar Balerdi 

Ander Gortazar Balerdi (Donostia, 1985) arkitektoa da. Euskal Herriko Unibertsitatean eta Institut d’arquitectura avançada de Catalunya-n ikasi zuen, eta aditua da hirigintzan, lurralde antolamenduan eta mugikortasunean. Nazioarteko proiektuetan lan egin zuen Varsoviako BuroHappold Engineering bulegoan, eta aholkulari independente moduan ere aritu da; 2018an RAZ estudioa sortu zuen Jacek Markusiewicz-ekin batera. Hirigintza irakasle laguntzailea da Euskal Herriko Unibertsitateko arkitektura eskolan, eta mugikortasun multimodalari buruzko tesia idazten ari da Universitat Politècnica de Catalunya-n.

Gilen Txintxurreta Beitia

Gilen Txintxurreta Beitia (Gasteiz, 1995) arkitektoa da, Euskal Herriko Unibertsitatean eta Universitat Politècnica de Catalunya-n ikasketak egin ostean. Hirigintzan eta lurralde antolakuntzan espezializatu da, eta Geografia Informazio Sistemekin lan egiten du. Eskala ezberdineko hiri plangintza dokumentuen garapenean parte hartu du, hirigintza aholkularitza eskaintzen du eta artikuluak idazten ditu prentsa generalistan.

Juan Beldarrain

Juan Beldarrain 1991n lizentziatu zen Nafarroako ETSAn, Karrera Amaierako Sari Bereziarekin. Berlinen hasi zuen bere ibilbide profesionala, J. P. Kleihues estudioan, eta, ondoren, Rafael Moneorentzat lan egin zuen, harik eta 2000. urtean Donostian bere estudio propioa ireki zuen arte.

Ia 25 urteko ibilbide profesionalean, erabilera eta tipologia askotako obrak garatu ditu, publikoak zein pribatuak, neurri handi batean, irabazi dituen arkitektura lehiaketei esker. Bere lanak hainbat aitortza eta sari jaso ditu nazio mailan, proiektuen kalitate arkitektonikoagatik eta eragin iraunkorragatik, besteak beste, LEED Platino kalifikazioengatik edo Arkitektoen Elkargoarenak, FADenak, Espainiako Arkitektura Biurtekoarenak, Civitas Novarenak edo Porcelanosarenak.